Tervetuloa Kasvoanalyyshiin

- viranomhainen joka tekkee kasvopuliittisia arviointia ja analyysiä

Kasvoanalyysi on valtion viranomhainen Elinkeinodeparttementin alla ja sillä on hallituksen tehtävä analyseerata ja arvioittea ruottalaista kasvopulitiikkaa. Ylheiskattava tavote on ette vahvistaa ruottalaista kilpailukykyä ja luoa eelytyksiä millä saathaan lissää töitä ja kasvavia yrityksiä kaikissa maan osissa.

Laajassa ruottalaisessa ja kansanvälisessä perspektiivissä met työskentelemä arvioinitten, analyysitten ja statistiikan kans. Meän työn pohja on tiete ja hyvin perusteltuja kokemuksia ja tämä pittää olla pohjana hallituksen ja valtiopäivitten puliittisille kannanotoile. Meän yhteistyökumppanilla on kasvopuliittinen pätevyys monela eri aloila. Met olema sen lisäks yhteistyössä  muitten viranomaisitten kans ja palkittema ulkopuolisia eksperttiä saataksheen parhaimat tulokset. Toiminta eelyttää hyvin läheistä yhteistyötä Hallituskanslian kans.

Meän tehtävä

Kasvoanalyysin tavote on ette ottaa framile tietoja päätöksitten pohjaks joka tuottaa tehokasta kasvopulitiikkaa ja vahvistaa ja luopi kansanvälisiä kontaktia. Kasvoanalyysi on hallituksen staapiviranomhainen arvioinile, analyysile, ulkomaassa olevhaan valvonthaan ja eistämistä kasvopulitiikan alueela. Viranomhaisen tehtävän mennee jakkaa näihin priuriteerathuin alueihin:

  1. Palveluja, palveluninnovasuunia ja toimivaa innovasuunisysteemiä.
  2. Ulkomaankontturi missä otethaan taltheen klopaliseerinkin maholisuuksia.
  3. Komplementi insatsia kapitaalihuolthoon ja neuvonanthoon.
  4. Alueelisen timensuunin merkitys hyväle kasvon eelytyksile koko Ruottissa.
  5. Statistiikkaa ja taattapaasia missä saathaan ylheiskuvia ja tehostamista.
  6. Kasvopulitiikka kestävälle kehitykselle.

Kolmela ostastola; Innovasuuni ja klopaalisia kohtauspaikkoja, Entreprenööriyyttä ja elinkeinoelämää sekä Käytettävyys ja alueelinen kasvo, on vastuu erilä osila tehtäväportföljistä ja luopi yhteistyötä saataksheen parhaimat tulokset.

Kasvoanalyysi on klopaalinen orkanisasuuni jossa on 40 palkkalistalla. Pääkontturi on Östersundissä ja meilä on toimintaa Stokholmissa. Jeneraalitirehtööri on Sonja Daltung.